Gindugang ang Grade 5 female students nga wala pa nakabaton sang Human Papillomavirus (HPV) vaccine sa target sang School-Based Immunization (SBI) “Bakuna Eskwela” campaign sang Department of Health (DOH), sa koordinasyon sang Department of Education (DepEd), nga ipatuman halin Oktubre 19 tubtob Disyembre 13.
Suno kay Mayette Gabanto, Nurse IV kag National Immunization Program Coordinator sang Measles-Rubella Supplemental Immunization Activity (MR-SIA), ang SBI isa ka tinuig nga programa sang DOH para mahatagan sang bakuna ang mga kabataan nga sakop sang target age groups.
Pahayag ni Gabanto, gindugang ang Grade 5 female students nga wala pa gid nabakunahan sang HPV agud maprotektahan ang mga ini batok sa cervical cancer.
Ginpahayag pa nga nagapadayon ang mga district health staff sa pagtalana sang schedule sang pagbakuna sa mga pampubliko nga eskwelahan, pagpatigayon sang information campaign, pagkuha sang parental consent, kag ginatipon man ang master list sang mga estudyante nga sakop sang programa.
Para naman sa mga pribado nga eskwelahan nga interesado nga magpartisipar, mahimo sila magsumiter sang letter of intent apang magadepende sa availability sang bakuna ang pag-accommodate sa ila mga estudyante.
Ginpakigbahin man ni Gabanto nag wala nalab-ot sang kampanya ang 95% nga vaccination target sang DOH Region 6, bangud sa mga kabudlayan sa pagpahangop sa mga ginikanan, ilabi na sa paglapta sang mga sayop nga impormasyon parte sa bakuna sa social media.
Bangud sini, ginapangabay ang mga ginikanan nga indi magpati sa mga fake news kag magkadto sa ila district health centers kung may pamangkot ukon pagduhaduha agud makabaton sang insakto nga impormasyon halin sa mga health personnel.
Dugang pa nga positibo ang City Health Office (CHO) nga may posibilidad nga malab-ot ang 95 porsyento nga target sa sini nga tuig bangud mas malawig ang campaign period halin Oktubre 19 tubtob Disyembre 13.
