Kilala ang Valentine’s Day sa pagpabutyag sang pagpalangga.
Indi man madula ang paghatagay sang regalo kada Pebrero 14.
Apang sa Japan, pinasahi ang pagselebrar sang Valentine’s Day.
Suno kay Bombo International Correspondent Josel Palma direkta sa Japan, may yara sang customs kag traditions ang nasambit nga pungsod sa pagselebrar sang sini nga okasyon.
Kun sa Pilipinas, kadam-an nga nagahatag sang regalo amo ang mga lalaki sa adlaw sang tagipusuon, apang didto sa Japan, babaye ang nagahatag sang regalo.
Apang isa ka bulan pagkatapos sang Valentine’s Day pahayag ni Palma partikular sa Marso 14 nga kilala bilang White Day, tion naman sang mga kalalakihan nga hatagan sang regalo ang babaye nga naghatag man sa ila sang Valentine’s Day.
Masami nga regalo sang mga babaye amo ang tsokolate nga may yara sang nagkalain-lain nga sabor kag styles.
Apang indi basta-basta tsokolate ang ginahatag sang mga babaye bangud ang tagsa ka tsokolate ang may yara sang buot silingon depende sa sahi sang isa ka relasyon.
Suno kay Palma, ang “giri choco” ukon kilala nga “obligation chocolates” ang ginahatag sa kaupod sa trabaho ukon myembro sang pamilya.
Ang “honmei choco” naman ang ginahatag sa isa ka tawo nga ginahigugma sang babaye — ukon mas kilala nga “love chocolates.”
Apang indi man tanan ang nagaselebrar sang Valentine’s Day kag White Day bangud popular man sa mga babaye nga nagahatag sang tsokolate ukon “tomo choco” sa ila man abyan nga babaye.
