ILOILO CITY – Ginpamatay na ang tanan nga baboy nga sakop sang 500-meter radius nagikan sa ground zero sa Barangay Sawang, Buenavista, Guimaras kun sa diin, may na-record nga kaso sang African swine fever.
Sa interview sang Bombo Radyo kay Guimaras Governor JC Rahman Nava, iya ginpahayag nga apat ka mga barangay sa palibot sang Sawang ang gin-isolate na sa subong.
Suno pa sa gobernador, duha ka mga baboy nagikan sa barangay ang nagpositibo sa nasambit nga animal disease.
Una na nga nagpagwa sang executive order si Nava nga temporaryo nga nagadumili sa pagsulod kag pagguwa sang mga swine, pork, pork products, kag by-products sa Buenavista, Guimaras kasunod sang na-record nga kaso sang balatian.
Sa subong, padayon man ang evaluation sa sulod sang one kilometer-radius nagikan sa ground zero.
Nagalaum si Nava nga isolated case lamang ang natabo bangud wala na sang may na-monitor pa sa gwa sang nasambit nga barangay.
