ILOILO CITY – Nagmandu si Iloilo City Mayor Jerry Treñas nga tutukan ang mga Badjao nga nagalihu-liho sa mga dalanon sa syudad sang Iloilo ilabi na sa Barangay Buhang sa distrito sang Jaro.
Sa interview sang Bombo Radyo kay Mr. Jeck Conlu, COVID-19 team spokesperson, iya ginpahayag nga plano sang syudad nga ibalik ang mga Badjao kun sa diin man ang ila nga place of origin ukon ginhalinan nga lugar.
Samtang yari pa sila sa syudad, plano man sang syudad nga hatagan sila sang personal protective equipment.
Hibaluon man suno kay Conlu kun pila sila kabilog kag kun diin sila nag-agi sang nagpuyo diri sa syudad bangud istrikto man ang mga ports of entry.
Ginpahayag ni Conlu nga kun sang una nabudlayan sila sa pagsaway sini nga mga Badjao, labi pa nga nagbudlay subong bangud posible carriers sila sang virus kag nagapakatig-a pa nga magsuksok sang face mask.
