ILOILO CITY – Ginpapauli na sang Department of Social Welfare and Development Region 6 ang 76 tanan ka mga badjao nga nagpadulong sa Iloilo sang damlag lang.
Ini matapos ang kontrobersyal nga sabtanay nanday Iloilo City Mayor Jerry Treñas kag Bacolod Vice Mayor El Cid Familiaran sa diin nagpahayag si Treñas nga indi “dumping ground” sang badjao ang syudad.
Sa interview sang Bombo Radyo kay Atty. Carmelo Nochete, director sang Department of Social Welfare and Development Region 6, iya ginpahayag nga nagpakig-angot na ang ahensya sa Dumangas Local Government Unit kag Iloilo City Government agud pabalikon ang nasambit nga indigenous group sa ila lugar sa Mindanao.
Suno kay Nochete, nagpain ang ahensya sang P10, 000 nga cash assistance sa mga na-rescue nga mga badjao nga ginalakipan sang 24 ka mga pamilya.
Ginpahayag dugang sang natungdan nga nagpakig-angot naman ini sa Department of Social Welfare and Development Region 9 ukon Zamboanga Peninsula agud tatapon ang mga badjao.
Nagakahangawa man ini sa nangin sitwasyon sang mga badjao bangud sa ginapasuni nga may yara sang sindikato nga grupo sa likod sang pagpabalik sang mga badjao sa rehiyon kag ginagamit sa pagpangalimos.
Apang, wala ini may mahimo kundi hatagan sang bulig kag ipabalik sa ila lugar sa Mindanao.
Sa subong, may yara sang close monitoring ang ahensya kaupod ang mga local government units agud malikawan ang kaangay nga insidente.
