ILOILO CITY – Isa na lang ka Dengue patient gikan sa Brgy. Baldoza, La Paz, Iloilo City ang nagapabilin sa hospital.
Sa interview sang Bombo Radyo kay Barangay Kagawad Henry Zamora sang nasambit nga lugar, iya ginpahayag nga nagapangaduha ang ila barangay sa listahan sa mga may pinakamadamu nga kaso sang Dengue Hemorrhagic Fever sa syudad sang Iloilo sa diin santo sa ila record, naglab-ot lamang sa 31 ang kaso sang Dengue kag isa ang patay apang santo naman sa City Health Office, naglab-ot na sa 58 ang kaso sang Dengue sa Barangay Baldoza.
Suno kay Zamora, may duha ka mga biktima ang nagdugang sa listahan sang Dengue patients subong nga Setyembre apang isa na lang ang nagapabilin sa hospital.
Isa sa ginalantaw ni Zamora nga rason kun nga-a nagdamu ang numero sang Dengue cases sa Barangay Baldoza amo nga madamu sang wayang ukon bakante nga lote sa nasambit nga area.
Sang nakaligad nga bulan, ginpahayag sang natungdan nga may yara man sang ginpatigayon nga fogging kag misting sa ila lugar agud nga indi na magdamo ang lamok nga nagadala sang balati-an.
Mas makapaayo man suno sa Barangay Kagawad nga magpatigayon pa gid sang fogging kag misting agud nga indi na madugangan ang kaso sang Dengue.
