ILOILO – Ginpadala na sa Crime Laboratory sa Police Regional Office 6 ang mga bala nga nasapwan sa crime scene sa diin ginpaarakan-luthang ang pick up sang 4th Engineering District sang Department of Public Works and Highways (DPWH) sa Brgy. Bolong Oeste, Santa Barbara, Iloilo.
Sa exclusive interview kay Pol. Lt. Aileen Lacrite, Deputy Station Commander sang Sta. Barabara Municipal Police Station, iya ginpahayag nga lima ka mga empty shells kag apat ka deformed slugs ang narekober sa ginluntaran sang insidente.
Suno kay Lacrite, maswerte nga wala maigo ang pasahero sang pick up nga si Engr. Eva Bedonia, pinuno sang Quality and Assurance Section sang 4th Engineering District sang DPWH nga amo ang target sang mga gun men bangud double coated ang pirtahan sang salakyan.
Sa subong, ginatinguhaaan pa sang mga otoridad nga makakuha sang Closed-circuit television (CCTV) footage agud magamit sa pagsolbar sang krimen.
Gin-athag man sang opisyal nga sa subong wala pa sila sang motibo sa insidente.
