Ginakadlawan na lang sang aktres nga si Marian Rivera ang mga huring-huring nga ginapalapta nga nagapahayag nga may ginpabusong nga babaye ang iya bana nga si Dingdong Dantes.
Sang damlag lang, malisyoso nga gin-angot sang publiko ang 40 anyos nga si Dingdong sa young actress nga si Lindsay de Vera.
Una na nga ginpanginwala ni Lindsay nga nagabusong siya kag ginkonsulta na niya sa iya abogado angot sa dapat himuon sa nagapalapta sang fake news.
Sa bahin naman sang 36 anyos nga si Marian, iya ginpahayag nga basta artista gani nga tawo, tanan nga posible nga isyu ang ginahaboy sa iya.
Kulang na lang suno kay Marian nga mag-istar ang mga tawo sa ila balay agud lang mahibaluan nila kun ano ang mga ginahimo sang artista.
Kaladlawan ini nga isyu suno sa aktres kag wala sang kamatuoran bangud sa balay lang nila nagatinir si Dingdong kag very transparent man sila sa isa kag isa.
Sa pihak nga bahin, kadlaw man sa gihapon ang sabat ni Marian sang ginpamangkot kun siya ang nagabusong.
Suno sa iya, wala pa sila sang plano nga sundan ang ila ikaduha nga anak.
