ILOILO – May yara sang 30-day grace period nga igahatag ang Police Regional Office (PRO) 6 sa 39 ka mga kabanwahan sa rehiyon agud nga madakpan na ang mga newly-identified drug personalities sa ila banwa kag makabig nga drug-free sa Western Visayas.
Sa 39 ka nag-apply sa drug clearing, 17 ang nagikan sa Iloilo, 12 ang nagikan sa Antique, isa sa Capiz, isa sa Guimaras, kag walo sa Aklan.
Ini nga data ang nagikan sa Philippine Drug Enforcement Agency (PDEA) Region 6 kag napetsahan Nobyembre 13.
Sa interview sang Bombo Radyo kay Pol. Lt. Col. Joem Malong, tagpamaba sang PRO 6, iya ginpahayag nga ang proseso nga ginasunod amo nga maga-conduct sang drug clearing operation sa mga drug-affected barangays, antes pa man mag-apply ang banwa sa Regional Oversight Committee.
Ini ang iga-assess sang PDEA, Philippine National Police (PNP), kag iban pa gid nga ahensya sang gobyerno.
Importante suno kay Malong nga sundon ang 30-day grace period sa pagdakop sang newly-identified drug personalities agud nga indi madula sa listahan kag indi makaapekto sa ila status.
Gin-athag man ni Malong nga wala madala ang syudad sang Iloilo bangud may mga barangay pa nga wala ma-clear kag mas mabudlay himuon nga drug-clear ang syudad ipaanggid sa mga banwa sa probinsya.
