ILOILO CITY – Ginkwestyon sang pila ka mga barangay kagawad sang Progreso, Lapuz, Iloilo City ang nangin aktu sang ila punong barangay nga pagdala sang donasyon sa ila balay.
Sa interview sang Bombo Radyo kay Brgy. Kagawad Julie Ann Lapating, iya ginpahayag nga kun tani, sa barangay hall gindala ang canned goods kag iban pa nga food packs nga gindonar sang isa ka pribado nga kompaniya.
Suno kay Lapating, nagapasalamat siya bangud nga inisyatibo ni Punong Barangay Mydee Sollano nga magpangayo sang bulig gikan sa mga pribado nga kompaniya apang kun tani, mangin hayag ang pagpanghatag sini sa mga pumuluyo.
Ginpahayag ni Lapating nga kun yara sa barangay hall ang repacking sang food packs, malikawan ang malisya kag madamo man ang magabulig sa pagpamutos sini.
Sa pagpaathag naman ni Punong Barangay Mydee Sollano, gindesisyunan niya nga dal-on sa iya balay ang food packs agud nga masiguro nga patas ang pagpanghatag.
Suno kay Sollano, kun sa barangay hall ibutang ang food packs, bisan sin-o lang ang mahimo nga makakuha kag ihatag sa ila mga kilala.
Kun tani suno sa natungdan, likawan na lang ang pagtuga sang malisya bangud nga wala siya sang tuyo nga kuhaon ang gindonar nga pagkaon.
