ILOILO CITY – Hugot nga nagpahanumdom sa liwat ang mga barangay official sang Bolilao Mandurriao, Iloilo City sa pumuluyo sa pagtuman sa mga health protocol agud matapna ang
Ini matapos ginlockdown ang anom ka mga boarding house sa nasambit nga lugar kasunod sang narekord nga 23 ka mga call center agent nga nagpositibo sa COVID-19.
Sa exclusive interview sang Bombo Radyo kay Punong Barangay Joy Salpin, iya ginpahayag nga nagahingyo siya sang kooperasyon sa ila pumuluyo bangud makahalangawa na ang pagsaka sang COVID-19 indi lamang sa ila barangay kundi mangin sa kabug-usan sang distrito sang Mandurriao.
Mas maayo suno kay Salpin nga mangin vigilante ang tanan sa pagsunod sa physical distancing, pagpanghinaw sang kamot, kag pagsuksok sang face mask kag face shield.
Nagpanugyan man ang natungdan sa iya pumuluyo nga kun mahimo, pakamaayuhon nga indi magwa sa mga balay kun wala man sang importante nga kadtuan.
Gin-ako ni Salpin nga nagapakitluoy na siya sa iya mga pumuluyo nga hatagan sang importansya ang pagsunod sa minimum health protocol nga ginamando sang Iloilo City Government kag COVID-19 Team bangud para ini sa ikaayong lawas sang tanan.
Matandaan nga una na nga ginpahayag ni Salpin nga nagapatigayon sila sang rekorida kada aga kag hapon sa diin nagapanagtag sila sang flyers para sa ila nga information drive agud nga mapaalinton ang pumuluyo sa paglikaw sa COVID-19.
