ILOILO CITY – Yara na sa maayo nga kahimtangan ang mga barangay official sa Western Visayas nga ginapahayag biktima sang food poisoning kadungan sang ginpatigayon nga Implementing Rules and Regulation Seminar sang Department of Budget and Management (DBM) sa Iloilo Grand Hotel sa syudad sang Iloilo.
Sa interview sang Bombo Radyo kay Punong Barangay Julie Siquio sang Nanga, Pototan, Iloilo, iya ginpahayag nga ginhuna-huna niya nga sila lang nga tatlo kaupod sang iya mga barangay kawagad ang nakabatyag sang pagla-in sang tiyan ukon Loose Bowel Movement (LBM) matapos nga makakaon sang pagkaon.
Nakibot na lang sila suno kay Siquio sang ila nahibalu-an nga ang mga barangay officials gikan sa Buruanga, Aklan kag Pototan, Iloilo ang nakabatyag man sang LBM matapos makakaon sang Sweet and Sour Meatballs, Sinigang kag Buttered Chicken.
Ginpahayag man sang Punong Barangay nga indi man pan-os ang ila ginkaon nga pagkaon kag wala man sila nagkuyam-kuyam.Maayo na lang suno kay Siquio nga ang iban sa ila ang nakabatyag sang alibyo matapos nga makatumar sang bulong apang ang iban sa ila ang gin-admit gid sa ospital.
Nagpromisa naman ang pamunu-an sang Iloilo Grand Hotel nga magahatag sang bulig sa mga nabiktima sang ginapahayag food poisoning.Nahibalu-an nga ang duha ka adlaw nga seminar sang mga barangay officials ang nagtakop kahapon nga adlaw.
