ILOILO CITY – Gin-alerto sang City Disaster Risk Reduction and Management Council (CDRRMC) ang mga kabarangayan sa siyudad sang Iloilo nga masami ginabaha.
Bangud ini sang mga pag-ulan nga tuga sang bagyo Vinta.
Suno kay Blair Peñaranda sang Early Warning System sang CDRRMC, ginpadal-an na sang mensahe ang mga barangay officials ilabi na ang mga masami nga ginabaha nga mag-aligmat.
Ginpaidalom man sa blue alert ang siyudad nga nagakahulugan nga may weather disturbances nga mahimo magtuga sang pagbaha.
Ginpasiguro man ni Peñaranda nga nakahanda naman ang ila mga response team.
Nahibaluan nga 73 ka mga barangay sa siyudad sang Iloilo ang ginakabig nga flood prone areas.