ILOILO CITY – Ginmanduan ni Iloilo City Mayor Jerry Treñas ang Task Force on Anti-Squatting and Illegal Structures Unit nga pakig-angotan ang mga Punong Barangay sa syudad sang Iloilo kag panugyanan nga magkooperar.
Sa interview sang Bombo Radyo kay Mr. Love Joy Hosenilla, pinuno sang Task Force on Anti-Squatting and Illegal Structures Unit, iya ginpahayag nga posible matapos ang 75 ka adlaw nga ginhatag sang Department of the Interior and Local Government agud makuha ang mga nagasablag sa dalan sa kada barangay sa Abril 30.
Gani todo ang pagpaninguha sang local government unit sa diin kun indi pa makapasar ang mga barangay sa syudad sa road clearing operation suno kay Hosenilla, mahimo gid sila nga masampolan.
Sa subong nagalibot ang Department of the Interior and Local Government sa mga kabarangayan agud nga mapahibalo ang mga Punong Barangay sang ila mga problema.
Ginapadulongan man sang nasambit nga task force ang mga barangay nga indi masarangan sang mga punong barangay nga sawayon ang ila residente bangud sa mga nagasablag sini nga istruktura.
Pahayag sang natungdan, ang problema subong sa syudad amo ang mga relocation site bangud sa makitid nga alagyan ukon wala sang bastante nga espasyo.
Isa man sa mga problema sang task force amo ang mga pumuluyo nga nagapakigbato nga may yara sila sang mga titulo sang duta nga ginatindugan sang ila balay ukon istruktura sa diin ini gina-verify sang otoridad ang ila ginakaptan nga mga dokumento.
