ILOILO CITY – Ginahatagan sang transition time ang tagsa ka barangay antes ipaidalom sa surgical ukon sa total lockdown.
Ini ang sabat ni Public Safety and Transportation Management Office head Jeck Conlu may kaangtanan sa reklamo sang mga Punong Barangay nga ginadali-dali ang pagpatuman sang lockdown kag indi makapreparar ang mga residente.
Sa interview sang Bombo Radyo kay Conlu, iya ginpahayag nga pagkatapos sang announcement, may mga district coordinator nga amo ang nagapaalinton sa barangay officials tuhoy sa lockdown.
Suno kay Conlu, kinahanglan nga i-assess anay sang COVID-19 team kun ano ka damo ang apektado sang lockdown kag kun ano ang mga kinahanglanon.
Ginpahayag ni Conlu nga ginatutukan sa subong amo ang information dissemination agud nga malikawan ang pagsalangisag.
