Nagbalik na naman sa dagat nga sakop sang Pilipinas ang mga barko sang China Coast Guard (CCG) kasunod sang pagligad na sang malain nga tyempo kag sunod-sunod nga mga bagyo.
Suno kay Commodore Jay Tarriela, Philippine Coast Guard (PCG) spokesperson para sa West Philippine Sea, tatlo ka mga Chinese ships ang nakit-an sa Panatag (Scarborough) Shoal. Ini ang may hull numbers nga 4203, 5303, kag 3502.
Nagpadala man ang Philippine Coast Guard (PCG) sang mga barko malapit sa dagat sang Zambales agud magpatigayon sang maritime law enforcement mission.
Matandaan nga Hulyo 24 sang nagbiya ang CCG vessels sa area bangud sa Bagyo Emong, kag na-monitor nga nagtinir sa ginabanta 110 nautical mils sa nabagatnan sang shoal.
