Gin-harass na naman sang China Coast Guard (CCG) ang mga barko sang Pilipinas nga yara sa Panatag Shoal sa West Philippine Sea.
Suno kay Philippine Coast Guard (PCG) spokesperson for the West Philippine Sea (WPS) Jay Tarriela, naggamit ang barko sang China sang water cannon batok sa mga barko sang Bureau of Fisheries and Aquatic Resources (BFAR).
Natabo ini 10:00 kahapon sang aga sang ginpadala ang mga barko nga BRP Datu Tamblot, BRP Datu Taradapit, BRP Datu Bankaya, kag BRP Datu Daya agud magpanagtag sang fuel subsidies sa mga manugpangisda nga Pinoy.
Suno kay Tarriela, nagpalapit kag naghimo sang agresibo nga maneuver ang CCG-4203 sa BRP Datu Taradapit sang ulihi, nagbomba pa ini sang tubig.
Apisar sang water cannon attack nga nag-igo sa port quarter sang BRP Datu Taradapit, nakapalayo ang vessel sang Pilipinas kag nalikawan ang mas daku nga halit.
Gin-target man sang water cannon sang CCG-3105 ang BRP Datu Tamblot apang wala ini naigo.
Sa amo nga operasyon, nakit-an man sa area ang anum ka CCH vessels, duha ka People’s Liberation Army (PLA) Navy warships, kag madamo nga Chinese maritime militia vessels.
Nagapati si Tarriela nga didto ang Chinese vessels agud balabagan ang BFAR sa iya pagpanghatag sang subsidiya.
Nagpanindugan ang Philippine Coast Guard nga wala sang ginlapas ang BFAR vessels bangud naglayag sila sa teritoryo nga sulod sa Exclusive Economic Zone sang Pilipinas kag nagsunod man sa Philippine Maritime Zones Act, United Nations Convention on the Law of the Sea (UNCLOS), kag sa 2016 Arbitral Award.
