Ginpaidalom sa heightened state of alert ang pila ka base-militar sang Estados Unidos sang Amerika nga nahamtang sa Europa.
Suno sa inisyal nga impormasyon halin sa duha ka wala ginhingadlan nga U.S. Officials, ginpasaka sa “Charlie” ang alert level sang Force Protection Condition (FPCON) sang weekend.
Ang “Charlie” suno sa U.S. Army amo ang ikaduha sa pinakamataas nga alert nga gina-apply kun may natabo nga insidente ukon may intelligence report nga nabaton nga may porma ukon terrorist action nga naga-target sa personnel ukon sa pasilidad.
Sa statement naman nga ginhatag sang U.S. European Command sa reporters, ginsiling nga gina-assess sini ang nagkalain-lain nga factors kaangot sa security kag safety.
“For operational security reasons, we will not get into specific measures, but we remain vigilant,” kabahin sang ginsapubliko sang EUCOM.
Ini nga mga development ang una gin-report sa Stars and Stripes nga isa ka independent military publication.
