ILOILO CITY– Makabatun sang P6,000 kada bulan ukon P12,000 sa sulod sang duha ka bulan ang mga benepesyaryo sang Social Amelioration Program sa idalom sa ng Department of Social Welfare and Development.
Ini ang magaserbe nga bulig sa mga benipesyaryo sa sining tion sang krisis bangud sa coronavirus disease 2019.
Sa interview sang Bombo Radyo kay Mae Castillo, Spokesperson sang Department of Social Welfare and Development VI, iya ginpahayag nga ang mga benipesyaryo ang ginalakipan sang mga informal economy workers, Pantawid Pamilyang Pilipino Program beneficiaries, mga nagabusong kag lactating women, mga balay nga may senior citizen kag disabled, indigenous people, Overseas Filipino Workers in distress, sub minimum wage earners, kabulig sa balay, driver sang pedicab, tricycle kag Public Utility Vehicles, nastranded nga mga trabahador, occasional workers, operators sang sari-sari stores, mangunguma, mga empleyado nga apektado sang no work no pay, solo parent, underprevilage, homeless, kag iban pa nga miyembro sang vulnerable nga sektor sang komunidad.
Suno kay Castillo, sa bahin sang mga 4Ps nga benepesyaryo, indi nila mabatun sang tingub ang P6,000 bangud may yara na sila nga daan sang ginabatun sa tagsa ka bulan, sa diin kun regular sila nga sang P2,100 pagadugangan ini sang P3,900, agud mangin P6,00 ang total.
Pahayag pa ni Castillo, magasulod sila sa isa ka Memorandum of Agreement kaupod sang Local Government Unit kag ang LGU na mismo ang magatap sa tagsa ka mga kabanwahanan kag kabarangay sa kun sin-o ang dapat yara sa listahan lakip na diri ang pagperma sang form nga social amelioration card.
Ang assessment naman sa kun qualified ukon indi ang isa ka benepesyaryo ang nakadepende na sa tagsa ka mga Local Government Unit.
Igadul-ong naman sa tagsa ka balay ang benepisyo nga ila makuha agud indi na ang mga ini makagwa pa bangud man sa ginapatuman nga enhanced community quarantine
May yara sang Food kag Non Food Component ang benepisyo apang ila ginaduso nga cash nalang ang ihatag.
Dugang pa sang natungdan, igamonitor naman sang ila ahensya kun nahatag sa natungdan ang benepisyo bangud kinahanglan nga may yara sang photo evidence sa tion nga maghatag sang benepisyo.
