Naglab-ot na sa 112 ang kaso sang nahalitan bangud sa palupok halin Disyembre 21 tubtob Disymebre 28, 2025.
Suno sa Department of Health, mas manubo ini sang 26% kumpara sa pareho man nga period sang nagligad nga tuig.
Pahayag sang ahensya, ini tanda man sang epektibo nga kampanya batok sa malain nga epekto sang palupok.
Na-rekord ang pinakamadamo nga kaso sa National Capital Region, sunod ang Ilocos Region, Central Luzon, kag Western Visayas.
Madamo sa mga biktima amo ang mga bata nga lalaki nga nag-edad 5 tubtob 14 anyos nga nagagamit sang palupok kaangay sang Piccolo, Kwitis, kag 5-Star.
Magluwas sa palupok, narekord man ang 376 ka aksidente sa kalsada kag 190 ka kaso sang noncommunicable diseases kaangay sang stroke, heart attack, kag asthma.
Suno pa sa DOH, madamo sa mga naga-eksperyensya sang stroke kag heart attack ang mga lalaki, samtang sa mga babyi naman ang madali nga maka-experiensya sang asthma.
Padayon ang panawagan sang DOH sa publiko nga maglikaw sa paggamit sang delikado nga palupok.
Nag-abiso man ini nga pilion ang safe nga mga alternatibo nga pampagahod para malikawan ang aksidente subong nga nagahilapit na ang pag-selebrar sang bag-ong tuig.
