Nagasaka ang numero sang online users sa Southeast Asia nga nagakabiktima sang love scams subong nga may pandemya.
Suno sa cybersecurity solutions firm nga Kaspersky, isa sa duha ka indibidwal ukon 45% sang respondents sa survey nga gin-conduct sang July sang nagligad nga tuig ang nangin biktima sang romance scams.
Sandig sa graph sang recorded ‘love scams’ sa region, ang most recorded incidents ang nagabalor sang indi magnubo sa $100 ukon masulusobra sa P5,000.
Kalabanan sa mga biktima ang nagikan sa Silent (1918-1945) generations nga naga-comprise sang 33% sang respondents.
Eight percent naman sang mga biktima ang nagikan sa Gen Z (1997-2009).
Ginalantaw nga mas mabiktima sang cybercriminals ang mga tigulang bangud sang ila retirement funds.
Yari ang pila ka panugyan agud nga indi mabiktima ang imo nga kuwarta kag mangin safe ang imo heart batok sa posible mga moves sang cybercriminals:
Kun maggamit sang social media sites, indi magbaton sang friend requests halin sa tawo nga indi mo kilala.
Likawi nga magbuyagyag sang personal information sa dating profile ukon sa tawo nga imo ka-chat ukon nakilala mo lang online.
Hinay-hinay lang. Pamangkuta ang imo ka-chat sang certain questions, obserbahi kun may mga inconsistencies ukon wala agud mahibal-an mo kun impostor ini ukon indi.
Kag ang importante, indi gid maghatag sang kuwarta sa tawo nga ka-relasyon mo lang online kag wala man kamo sang relasyon offline.
