Nagapanawagan sang dugang pa nga bulig ang mga biktima sang sunog sa Barangay Old Airport, Mandurriao, Iloilo City.
Nahibaluan nga nagluntad sang Marso 11 ang sunog nga naglamon sa masobra 50 ka mga puloy-an.
Yara subong sa Mandurriao Elementary School ang masobra sa 300 ka mga indibidwal lakip na ang mga kabataan nga gulpyada lang nadulaan sang puloy-an.
Sa interview sang Bombo Radyo kay Punong Barangay Jose Benjie Macailing sang Brgy Old Airport, Mandurriao, iya ginpahayag nga nagakinahanglan gid sang tubig ang mga residente nga yara sa evacuation center.
Nagapangayo man sang bulig ang mga ginikanan sang mga new born babies sang dugang nga gamit, diapers kag gatas para sa ila mga bata.
Suno kay Macailing, nakahinun-anon na niya si Iloilo City Mayor Jerry Treñas kag nagpasalig man ini sang relocation site nga amo ang patindugan sang bag-o nga mga puloy-an sang mga apektado sang sunog.
Nagpasalig man ang alkalde suno sa iya sang cash aid nga amo ang ipanagtag sa tagsa ka pamilya.
Dugang pa ni Macailing, ginabanta masobra sa 500 tanan ka mga balay ang nahamtang sa lugar nga natabuan sang sunog.
