Isa ka sahi sang skin inflammation ang psoriasis sa diin ang lawas sang tawo ang makaangkon sang abnormalidad sa paghimo sang skin cells.
Sa programa Dr. Bombo, ginpahayag ni Dr. Elvin Tiangha nga ang proseso sang pagbaylo sang panit sang isa ka tawo ang nagalab-ot sa 28 tubtob 30 ka adlaw apang sa kondisyon sang Psoriasis, nagalab-ot lamang sang tatlo tubtob apat ka adlaw ang bilog nga proseso sa pagbaylo sang panit sang tawo.
Ini ang rason sa pag-angkon sang pagpalangdamol kag paghimbis sang panit.
Suno kay Dr. Tiangha indi pa gid mapat-od ang gintunaan sang psoriasis apang base sa mga mangin-alamon sa medisina, mahimo makuha ang psoriasis sa pamilya, mahina nga immune system kag sa palibot.
Kun eczema naman ang pagahambalan, ini ang ginakabig long-term condition nga nagaapekto sa panit.
Ini ang mapula kag sa palibot sini ang maitom.
Nagatuhaw ang eczema sa sulod sang siko, likod sang kamot kag likod man sang tuhod kag kadam-an nga nagakaangkon sini amo ang mga bata.
Samtang ang psoriasis naman ang makit-an sa guwa sang siko ukon kabaliskaran sang eczema kag ang masami ginatubo-an amo ang mga teenagers ukon adults.
Agud nga malikawan ang pag-angkon sang psoriasis pahayag sang eksperto, likawan ang pagbulad sa initan, pag-inom sang makahulubog nga ilimnon, pagpanigarilyo, likawan man ang stress kag ipabilin ang healthy lifestyle.
