Nagahingyo sa Iloilo City Government ang mga bolantero sa Iloilo Terminal Market nga hatagan sila sang tyansa nga makabaligya.
Ini kasunod sa isa ka video nga nagalapta sa karun sa social media kun sa diin makit-an nga nagpatigayon sang clearing operation kag ginpangkuha sang personnel sang Local Economic Enterprise Office (LEEO) ang mga baligya sang mga bolantero sang gab-i sang Marso 6.
Sa interview sang Bombo Radyo kay Juls, isa sa mga naga-bolante kag na-eksperyensyahan mismo ang natabo nga clearing operation, iya ginpahayag nga gulpyada lang nag-abot ang personnel sang LEEO kaupod ang katapo sang Iloilo City Police Office (ICPO) sa lugar kag gilayon nagpatigayon sang clearing operation.
Suno kay Juls, wala sang ‘notice’ nga ginhatag sang ila ang LEEO kun sa diin ginpangkuha lang gilayon ang ila mga baligya pati ang ila nga kilohan.
Pahayag niya, nakuha ang duha ka sako sang kalabasa sang iya kaupdanan nga mag-asawa nga naga-bolante man sa lugar kun sa diin ginkarga ini sang LEEO kag gindala.
Suno sa mga naga-bolante, ginpahayag sang personnel sang LEEO nga posible nga makuha ang ila baligya kag gawadon sa ila nga opisina.
Ginpahayag naman ni Juls nga nagalab-ot P1,000 tubtob P2,000 ang balor sang isa ka sako sang ila baligya kun ila ini gawadon.
Dugang pa niya, antes sila magpwesto kag magbaligya ginasiguro nila nga sarado na ang merkado kag iya man ginklaro nga wala sila nagasinabad sa lugar kag ginatuyo lamang nga makabaligya agud maka-kwarta kag may ibuhi sa ila nga mga pamilya.
Words by: Bombo Krylle Melliza
