ILOILO CITY – Nakahanda na ang mga Business process outsourcing (BPO) companies sa Iloilo sa pagpanumbalik na sang full on-site capacity kasunod sang pagpaidalom na sa syudad sa alert level 1.
Sa Abril 1, dulaon na ang work from home setup sang mga call center agents.
Sa interview sang Bombo Radyo kay Joeven Tansi, Executive Director sang Iloilo Federation for Information Technology, iya ginpahayag nga may yara sang naka-standby nga medical team sa tagsa ka mga BPO companies.
Kumpiyansa si Tansi nga safe ang pagbalik sang mga call center agents kag subong nagasugod na sa pagpanghimos ang mga kompaniya.
Pahayag dugang ni Tansi nga dako ang disbentaha kun naga work from home lamang ang mga agents.
Pila ka disbentaha amo ang indi maayo nga kalidad sang serbisyo nga mahatag sang mga trabahante bangud sang indi manami nga internet connection kag naga apekto man sa trabaho ang sitwasyon sang palibot kaangay sang magahod nga taghol sang ido kag tukturu-uko sang manok.
Kinahanglan man suno kay Tansi ang supervision sang team leader sang tagsa ka agents.
Ang myembro sang Philippine Economic Zone Authority ang kinahanglan nga magbalik on-site sa Abril 1.
