ILOILO CITY – Nagpanindugan ang mga barangay official sang Bakhaw, Mandurriao nga nahimo na nila ang ila nga responsibilidad may kaangtanan sa problema sang iligal nga droga.
Sang nagligad nga semana, 32 ka mga durugista ang nadakpan sang Regional Police Drug Enforcement Unit VI sa amo nga barangay.
Sa interview sang Bombo Radyo kay Punong Barangay Joel Alvarado, iya ginpahayag nga ang ila barangay ang una nga naghimo sang resolution nga nagapangayo sang police assistant kag naga-require sa mga nagasulod sa ila barangay nga magsulat sang ila nga pangalan.
Suno kay Alvarado, may yara tuod sang gin-deploy nga mga pulis apang wala man sa gihapon sang epekto bangud nga daw kaangay nga wala man nahadlok sa gihapon ang mga iligalista nga magsulod-gwa sa ila barangay.
Ang mga pulis ang mga bag-o pa lamang kag wala gani sang ginakaptan nga service firearm.
Wala man sila nagapatigayon sang checkpoint sa baylo, nagatindog lamang kag nagakapot sang cellphone.
Nagpangabay man ang opisyal sa Philippine National Police kag sa Philippine Drug Enforcement Agency nga buligan sila sa ila problema sa iligal nga droga.
