Nagsaka sa tatlo sa masobra 30 ka mga indibidwal ang nagpositibo sa COVID-19 sa Tanza Baybay, Iloilo City Proper matapos nagpasugot sa clinical trial sang Chinese Pharmaceutical companies.
Sa interview sang Bombo Radyo kay Punong Barangay Dominador Deocampo sang nasambit nga lugar, iya ginpahayag nga indi siya pabor nga nagapa-recruit ang iya pumuluyo sa amo nga trial bangud sa tion nga may magpositibo sa virus, apektado ang pila ka mga indibidwal sa ila lugar bangud sa ginapatuman nga surgical lockdown.
Nahibaluan nga antes ang clinical trial, ginapaidalom anay sa reverse transcription–polymerase chain reaction (RT-PCR) test ang mga participants.
Pahayag sang opisyal, indi na nila luyag nga makapadulong pa sa ila lugar ang mga recruiters sang trial nga wala man nagalisensya ukon nagapakig-angot sa ila barangay.
Nagapasalamat man siya nga ginpauntat na ni Iloilo City Mayor Jerry Treñas ang duha ka mga clinical trial nga ginahimo sa syudad.
Apisar sini suno kay Deocampo, 24/7 nga nagabantay sa gihapon ang ila mga barangay tanod sa palibot sang ila lugar agud masigurado nga wala sang may makasulod nga recruiters nga nagapang-engganyo sa mga pumuluyo sa pag-upod sa clinical trial kabaylo sang P2,500.
