ILOILO CITY – Posible nga ipasirado sang syudad ang mga daan nga building sa Ledesma-Iznart Streets sa Iloilo City Proper sa tion nga indi ma-retrofit bangud sang nagkalahulog nga mga crystal.
Sa interview sang Bombo Radyo kay Engr. Mavi Gustilo, head sang Office of the Building Official, iya ginpahayag nga sa ginpatigayon nga Annual Safety Inspection sang nagligad nga tuig, nakahatag na sila sang recommendation sa tag-iya sang mga building nga i-retrofit na ang ila properties.
Apang, suno kay Gustilo, wala ini ginsapak sang mga tag-iya.
Dugang pa sang natungdan, ang mga tag-iya sang mga building ang wala subong sa syudad sang Iloilo gani, nabudlayan ang opisina nga mag-coordinate sa ila.
Bangud sang natabo sang nagliligad nga mga inadlaw, liwat nga magapagwa sang recommendation ang Office of the Building Official nga i-rehabilitate ang building.
Sa tion nga indi pa ang mga ini magsunod, ipasirado sang syudad ang building kag hatagan lamang sang tion agud nga makapangita sang temporaryo nga salayluhan.
Sa subong, ginpangkuha na ang mga crystal nga posible mahulog agud nga indi makaperwesyo sa mga pumuluyo nga naga-agi sa lugar.
