SAN ISIDRO JARO ILOILO CITY— Ginkakibot sang pila ka mga naga-istar sa balay nga gin-award sa ila sang mga taga Department of Social Welfare and Development (DSWD) sa Barangay San Isidro Jaro Iloilo City nga may yara na sang bag-o nga mga okupante santo man sa certificate nga ginhatag sang Iloilo City Urban Poor and Affairs Office (ICUPAO).
Sa interview sang Bombo Radyo sa una nga okupante sang balay nga si Pacita Madrigal, iya ginpahayag nga nakibot na lamang siya sang pag-abot niya nagikan sa trabaho, naguba na ang kandado sang iya balay, yara na sagwa ang iya mga gamit kag may bag-o na nga naga-estar.
Suno kay Madrigal ang nasambit nga balay ang ginhatag sa ila sadto sang DSWD kag may yara siya sang nagakaigo nga mga papeles nga makapamatuod nga siya ang legal nga naga-okupa sang balay.
Magluwas sa dokumento suno sa iya, may yara man sang litrato nga makapamatuod nga gin-award nga siya ang awardee.
Dugang niya nga iya pagapanindugan nga siya ang nagapanag-iya kag kuhaon niya ang iya balay.
Samtang sa interview sang Bombo Radyo sa bag-o nga okupante sang balay nga si Aisa Rica De La Gente, iya ginpahayag nga ginsunod lang nila kun ano ang ginhambal sang ICUPAO.
