ILOILO CITY – Ginalauman nga magadagsa ang mga deboto nga magatabuk sa probinsya sang Guimaras sa Semana Santa.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga ginabanta 18, 000 ka mga deboto ang magapadulong sa Guimaras sa Byernes Santo, Abril 7 nga amo ang adlaw nga ginalauman nga magdugok ang tawo bangud sa liwat nga pagbalik sang Pagtaltal Sa Bala-an Bukid.
Suno kay Conlu, agud nga malikawan ang stampede kag anuman nga disgrasya, may ginhanda nga foot and vehicular traffic scheme.
Ang mga depampasahero nga jeep ang tubtob lamang sa Barangay Veteran’s Village, Iloilo City Proper apang suno kay Conlu, mahimo sila nga magliso sa opisina sang Philippine Drug Enforcement Agency sa tion nga indi pa malawig ang pila sang mga pasahero.
Sa Parola wharf, may yara sang apat ka linya para sa mga deboto kag sa mga modernized boats na magabayad kag magalista sang pangalan sa manifesto agud nga malikawan ang delay.
Nagdangat naman sa 40 ka mga modernized boats ang magabyahe nga may 60-80 capacity lakip na ang iya sang Yohan nga maka-accommodate sang masobra sa 150 ka mga pasahero.
Ang byahe suno kay Conlu ang posible nga magasugod alas-kwatro ang takna sang aga.
Subong nga tuig, wala na sang direct nga byahe sang modernized boat sa tiilan sang Bala-an Bukid.
Sa subong, ginpaidalom na sa blue alert status ang Disaster Council sang syudad.
Nahibaluan nga tatlo ka tuig nga wala sang may ginpatigayon nga aktibidad sa probinsya sang Guimaras bangud sa Coronavirus Disease 2019.
