ILOILO CITY – Naglab-ot sa 61 ka mga driver, konduktor, kag dispatcher sang pampubliko nga salakyan sa bug-os nga pungsod ang nagpositibo sa iligal nga droga antes pa man ang pag-umpisa sang Semana Santa.
Suno sa Philippine Drug Enforcement Agency (PDEA), yara sa 4,210 ka mga indibidwal ang nagpaidalom sa screening sa ginpatigayon nga Oplan Harabas.
Ginpatigayon ini sa mga bus, jeepney, tricycle, kag public utility vehicle (PUV) terminals sa bug-os nga pungsod.
Kun pahat-pahaton ang mga nagpositibo sa iligal nga droga, 27 diri ang tricycle drivers, 10 ang jeepney drivers, 11 ang bus drivers, pito ang van drivers, lima ang conductors, kag isa ang dispatcher.
Sandig sa resulta, ang ginpang-gamit amo ang methamphetamine hydrochloride ukon shabu, kag marijuana.
Apang gin-athag sang PDEA nga kinahanglan pa ang confirmatory test.
Kun magpositibo liwat sa confirmatory test, indi na ini pagpahanugutan nga magbyahe kag kumpiskaron man ang lisensya.
