ILOILO CITY – Madamo sa gihapon sang mga drug surrenderers sa Western Visayas ang wala nakatapos sang ila rehabilitation program.
Ang pagpaidalom sa rehabilitation program ang isa sa mga parameters agud nga madeklarar nga drug free ang isa ka barangay.
Sa interview sang Bombo Radyo kay Shey Tanaleon, spokesperson sang Philippine Drug Enforcement Agency (PDEA) VI, iya ginpahayag nga ang kadam-an sa mga drug surrenderers ang mga breadwinners gani nga naga-untat sila sa tunga-tunga sang ila nga programa.
Samtang, ginklaro ni Tanaleon nga nagapadayon sa gihapon ang anti-illegal drug operation sang kapulisan kag sang PDEA sa mga barangay nga gin-clear na sa iligal nga droga.
Kinahanglan sang Barangay Anti-Drug Abuse Council (BADAC) nga i-sustain ang ila nga status.
Agud nga mahimo ini, kinahanglan nga timely ang pag-report sang illegal drug status sa barangay kag sa sulod sang 60 ka adlaw, kinahanglan nga ma-aktuhan ini sang kapulisan ukon sang PDEA.
Sa tion nga mag-lapse na ang period, mahimo gid nga ma-revoke ang ila nga status.
Sa Western Visayas, 88.33% na sang mga barangay ang drug cleared suno sa PDEA.
