ILOILO CITY – Ginpa-Bombo sang masobra 15 ka mga electricians nga nagatrabaho sa ginapatindog nga condominium unit sa distrito sang Mandurriao ang ila nga project engineer bangud wala sila sa gihapon naswelduhan sang pila ka bulan.
Sa interview sang Bombo Radyo kay Ronald Barcemo, tagreklamo, iya ginpahayag nga halos naglab-ot na sa P25, 000 ang sweldo sang tagsa ka isa sa ila nga 16 ka bilog.
Sila ang nagatrabaho sa idalom sang 13th CBC Ukon Connectivity Builders Corporation.
Suno kay Barcemo, makapila na ka beses sila nga ginpasalig sang ila nga project engineer nga si Engr. Jelo Quilantang kag gintug-anan nga hatagan sang sweldo apang wala sa gihapon nag-abot.
Dugang pa ni Barcemo, magluwas sa balayran sa ginatiniran nga boarding house, may yara pa sang utang sa kalan-an kag allowance sa adlaw-adlaw.
Sang nagpadulong sila sa kay Engr. Quilantang, ginhambalan sila nga ginapa-hold sang management ang ila nga sweldo.
Sang nagreklamo sila sa Department of Labor and Employment (DOLE), indi na ma-contact si Engr. Quilantang.
Ang 16 ka mga electricians ang nagikan pa sa nagkalain-lain nga bahin sang Western Visayas.
