ILOILO – Nagpahamtang sang tarpauline ang mga empleyado sang Iloilo Provincial Capitol sa ika duha nga panalgan sang establisimento sa diin nasaad ang paghingyo sa Sangguiniang Panlalawigan nga ipasar na ang 2019 annual budget sang probinsya.
Sa interview sang Bombo Radyo kay Joecel Mayor, Presidente sang association of government employees, iya ginapahayag nga nagpatawag sila sang pagsinapol agud nga ipalab-ot sa pamunuan sang SP ang ila nga panawagan.
Nagpasa man sang sulat ang asosasyon sa SP sa diin ginpatpat ang mga epekto sa empleyado kun indi mapasar ang budget sang probinsya.
Suno kay Mayor, maapektuhan ang fourth tranche ukon pagpataas sang sweldo; anniversary bonus; collective negotiation agreement incentive; loyalty pay; step; increament; terminal pay kag iban pa nga benepisyo kun indi pa mapasar ang pondo.
Dugang pa sang natungdan, naga-agunto ang mga empleyado bangud sa pag-delay sa pagpasar sang pondo sang probinsya.
Nagalaum si Mayor nga makatambong ang mga empleyado subong sa session agud nga mapukaw man ang balatyagon sang mga board member.
