May yara sang batunon nga collective negotiation agreement incentive ang mga empleyado sang Iloilo Provincial Government magluwas sa 13th month pay.
Sa interview sang Bombo Radyo kay Atty. Suzette Mamon, Iloilo Provincial Administrator, iya ginpahayag nga ang makabaton sang nasambit nga incentive amo ang mga regular , coterminous kag elective employees amo man ang mga casual plantilla.
Suno kay Mamon, P22,000 ang incentive apang may yara ini sang tax gani lauman nga indi bilog nga kantidad ang mabaton sang mga empleyado.
Makabaton man sang P4,000 nga incentive ang mga barangay day care workers, barangay health workers, barangay nutrition scholars kag barangay service point officers.
Ginahitso na lang sang Provincial Treasurer’s Office kag Provincial Health Office suno kay Mamon kun paano ipatigayon ang pagpanagtag sang incentive nga malikawan ang pagdugok sang tawo kag masunod sa gihapon ang health protocols.
Sa subong, indi pa mapat-od kun san-o mahatag ang incentive sa ginabanta 8,000 tubtob 9,000 ka mga indibidwal.
