BATANGAS – Padayon nga nagaserbe bilang calamity responders ang pila ka mga empleyado sang isa ka resort sa banwa sang Mataas na Kahoy, Batangas pagkatapos nga naglupok ang Bukang Taal.
Sa interview sang Bombo Radyo kay Frank Napura, isa sa mga empleyado sang amo nga resort, nahanas na nga daan ang mga trabahador agud makabulig sa iban nga tawo sa tion nga magluntad ang kaangay nga kalamidad.
Suno kay Napura, sa subong, pulo sa ila nga mga empleyado ang nagpabilin gid sa lugar kaupod ang mga katapo sang Philippine National Police (PNP) kag iban pa nga rescue teams apisar wala pa lubos nga nagkalma ang Taal Volcano.
Pahayag sang natungdan, wala na sang makit-an nga pagpangilat kag wala na sang mabatian nga pagpanaguob, apang may ginabuga sa gihapon nga abo ang bulkan.
Apisar indi na tuman ka damol ang abo kag asu, nagapadayon gihapon ang ashfall amo nga kun mag-gwa ang mga tawo, nagagamit ang kalabanan sang shades agud malikawan ang pagkapuling.
Bangud wala na sang sarang mabaklan sang face mask, naga-remedyo ang iban paagi sa pagbasa sang ila mga panyo kag daan nga mga bayo.
Suno pa sa natungdan, sa subong, ‘dark black’ ukon tuman na ka itom ang tubig sa swimming pool sang resort kag mabudlay man ang pag-agi sa karsada.
Samtang, wala pa sa gihapon ginatugutan sang Batangas Provincial Disaster Risk Reduction and Management Office (PDRRMO) ang mga pumuluyo nga magbalik sa ila mga lugar.
Suno kay Napura, yara sa gihapon sa Alert Level 4 ang estado sang lugar malapit sa Taal Volcano, kag tubtob indi ini makapanaug sa Alert Level 2, indi mahimo nga magbalik ang mga tawo sa lugar agud malikawan ang risgo kag kaswalidad.
Bangud yara nahamtang ang resort sa mataas nga bahin kag tuman ka lapit sa bulkan, ginpahayag ni Napura nga sila man ang nagabulig sa pag-monitor.
Ginahulat nila ang mandu sang Local Government Unit (LGU) kag Philippine Institute of Volcanology and Seismology (PHIVOLCS) kun bala, hilway na ang tanan sa pagbalik sa ila tagsa ka buluhaton.
Sa bahin naman sang mga halit, suno kay Napura, wala man sang dalagku nga naguba nga imprastraktura sa Mataas na Kahoy, Batangas bangud mahinay man lang ang nagluntad nga mga linog.
