Mga employer sa pribado nga kompaniya, mahimo na nga mag apply sa DOLE-CAMP agud makabaton sang P5,000

ILOILO – Bukas ang Department of Labor and Employment nga magbaton sang mga applications sang mga empleyado sa pribado nga kompaniya nga may yara sang flexible working arrangement kag nagpatuman sang temporary closure.

Ini ang may kaangtanan sa programa sang Department of Labor and Employment nga COVID-19 Adjustment Measures Program (CAMP).

Sa interview sang Bombo Radyo kay Niezel Sabrido, tagpamaba sang Department of Labor and Employment Region 6, iya ginpahayag nga makabaton sang P5,000 ang mga empleyado sang pribado nga kompaniya nga nagpatigayon sang flexible working arrangement kag nagpatuman sang temporary closure.

Suno kay Sabrido, agud nga maka avail sang P5,000 nga financial assistance, ang mga apektado nga empleyado ang mahimo nga makapasa sang DOLE Establishment Report on the COVID-19 Form kag company payroll sa bulan sang Pebrero ukon sa bulan nga ginpatuman ang flexible working arrangement kag temporary closure.

Dugang pa sang natungdan, prayoridad sang Department of Labor and Employment ang mga empleyado sang mga magagmay nga kompaniya.

Para sa tanan nga luyag mag apply sang DOLE-CAMP, mahimo nga ipadala ang mga requirement sa doleiloilocamp@gmail.com