ILOILO – Daku ang papel sang mga eskwelahan sa padayon nga paghurma kag pagbalik sang nagakatunaw na nga interes sang mga kabataan sa sining.
Ini ang ginpahayag ni Dr. Jose Jimenez Patubo, isa ka music, arts and culture professor, kag certified cultural mapping facilitator sang National Commission for Culture and the Arts, kag tourism officer sang San Enrique, Iloilo.
Sa interview sang Bombo Radyo kay Dr. Patubo, iya ginpahayag nga dapat ipa-hangop sa mga estudyante ang kabilinggan sang paghibalo sang ila maragtas ukon history indi lamang bilang isa ka requirement sa eskwelahan kundi bilang isa ka “moral obligation.”
Suno kay Dr. Patubo, mahimo ini kon may ara sila sang pag-apresyar sa sining.
Iya ginpahayag nga madamo na sang mga paagi ang eskwelahan sa pagtudlo subong bangud sa teknolohiya, kag madamo na sang lugar nga pwede maplastar ini nga adbokasiya, ilabi na subong nga bulan sang Oktubre nga amo ang National Museum and Galleries Month.
Dugang ni Dr. Patubo, masubo panumdumon nga isa sa napulo ka mga estudyante na gid lamang ang may interes sa pagkadto sa mga museum apisar nga may yara nahamtang nga mga museum sa syudad sang Iloilo.
Talalupangdon man suno sa iya ang amat-amat nga pagkadula sang literary kag performing arts.
