Sunod-sunod nga ginpuhag sang bomb threat ang lima ka mga educational institution sa Iloilo subong gid lamang nga aga.
Ang una nga nakabaton sang pamahog kaina sang kaagahon amo ang Iloilo National High School (INHS) sa La Paz, Iloilo City.
Gin-send man sa Facebook page sang Bombo Radyo Iloilo ang pamahog kun sa diin nag-alegar ang sender nga si certain “Nestor Villagracia” nga nagbilin siya sang siyam ka time bombs sa amo nga eskwelahan bangud sa indi patas nga pagtratar sa mga kabataan.
Kasunod sini, ang amo nga persona ang nagpadala man sang pamahog sa kaingod lang nga eskwelahan nga amo ang West Visayas State University (WVSU)Main Campus.
Ginpaagi sini sa comment section sang Facebook post sang isa ka school organization ang iya pamahog. Nagpahayag ini nga may “unfair treatment” sa unibersidad rason nga nagtanum siya sang lima ka time bombs.
Pareho na nga nakumpirma sang awtoridad nga safe ang mga buluthuan kag wala sang nakit-an ang Explosive Ordnance Disposal team nga anuman nga explosive devices. Sa pihak sang kumpirmasyon, pareho nga gin-suspend ang klase sa amo nga mga buluthuan.
Pagkasunod sini, nakabaton man sang bomb threat ang WVSU Calinog Campus sa Calinog, Iloilo; ang Iloilo Science and Technology University (ISAT-U) sa La Paz, Iloilo City; kag ang Hua Siong College of Iloilo sa Iznart, City Proper.
Matandaan nga sang nagligad nga semana, may duha man ka bomb threats sa ISAT-U kag isa sa University of San Agustin- Basic Education Department.
Padayon pa nga gina-imbestigaran sang awtoridad ang identity sang perpetrator.
