ILOILO – Nagakinahanglan sang 13,297 ka mga classrooms ang elementarya kag sekondarya nga mga eskwelahan sa Western Visayas.
Base sa data sang Department of Education Region 6 as of March 2023, ang Negros Occidental ang may yara sang mataas nga numero nga nagakinahanglan sang dugang nga classrooms nga nagdangat sa 7,837.
Samtang, ang probinsya naman sang Iloilo ang nagakinahanglan sang 373 ka mga classrooms.
Wala naman sang kulang nga mga classrooms ang syudad sang Iloilo, Guimaras, Bago City kag Himamaylan City.
Sa interview sang Bombo Radyo kay Dr. Ramir Uytico, Director sang Department of Education Region 6, iya ginpahayag nga wala sang katapusan ang kinahanglanon nga classrooms sa Pilipinas.
Sa pagkamatuod suno kay Uytico, wala sang bastante nga pondo ang gobyerno para sa pagpatukod sang buildings sa mga eskwelahan.
Sa bahin naman ni Dr. Amelita Pitalgo, Chief sang Education Support Services Division, iya ginpahayag nga lack of funds kag devolution of school buildings ang mayor nga rason kun ngaa may mga kulang pa nga classrooms sa mga eskwelahan.
Nagpasalig naman si Education Secretary kag Vice President Sara Duterte nga tutukan sini ang paghatag sang solusyon ang problema sa mga imprastruktura sang departamento nga nagaapekto sa pag-eskwela sang mga estudyante.
Subong nga tuig suno kay Duterte, may yara sang P15.6 billion nga pondo ang Department of Education nga magapatukod sang 6,000 ka mga classrooms.
