Guilty ka man sa masami nga pag-picture picture kun may makit-an ikaw nga espiho?
Madamo gid sa aton ang nanamian sa mirror selfies, ilabi na kun feel na feel gid naton ang aton OOTD ukon ang aton nga Outfit of the Day!
Sa Estados Unidos sang Amerika, ginpangkakas na ini nga mga espiho sa mga restroom sa rason nga nagabalik-balik ang mga estudyante kag nagakadugayan bangud sa ila pag-video-video sang ila nga mga saot!
Natabo ini sa Alamance Burlington School System sa North Carolina.
Sa average suno sa opisyal sang eskwelahan, tag-apat lamang ka beses nga naga-guwa ang estudyante agud nga magkadto sa CR.
Apang sang ulihi, natalupangdan sang mga manunulo nga daw naga-pito tubtub siyam ka beses gid nga naga-guwa ang ila estudyante kag nagakadugayan pa antes magbalik.
Bangud natukiban nga nanamian gali ang mga estudyante nga mag-shoot sang ila TikTok videos sa mga espiho sa restroom, ginpangkakas ini sang eskwelahan sang nagligad lamang nga semana.
Natabo man ini sa Piedmont Triad Middle School nga yara man gihapon sa state sang North Carolina.
Suno sa eskwelahan, positibo ang resulta sang ginpangkuha nila ang mga espiho sa ila restrooms bangud wala sang nagapakadto-pakari nga mga estudyante agud mag-CR kag wala sang nagapalawig sa sulod.
Ginmensyonar man sang eskwelahan nga may yara sila sang active approach agud nga tudluan ang ila nga mga estudyante kaangot sa digital citizenship” agud nga mapahangop sa mga bata kun san-o dapat gamiton ang cellphone kag san-o ini ipahigad agud pasulabihon ang mas importante nga mga bagay kaangay sang pagtuon.#
(Photo: Newsweek)
