Naglapta na ang mga espiya sang China halin sa Batanes tubtub sa Sulu, kag lakip sa ginalantaw nga impluwensyahan sini amo ang resulta sang presidential elections sa 2028.
Suno sa security analyst nga si Chester Cabalza, nagapadayon ang Chinese espionage operations diri sa pungsod bangud sang mga isyu kaangay sang West Philippine Sea kag illegal gambling operators.
Kun eleksyon ang pagahambalan, ginpahayag ni Cabalza nga magabubo sila sang pondo para nga makaapekto sila sa resulta sang piniliay: “Nagbe-bet din ‘yan kung sino ang magiging presidente natin. They will pour out campaign funds para maimpluwensiyahan ‘yung foreign and security policies natin.”
Pahayag pa sini, nagtuyo pa ang Chinese “sleeper agents” nga sudlon ang critical institutions kaangay sang Armed Forces kag Philippine Coast Guard. Sa pagkamatuod suno sa iya, may mga espiya nga makahihalo maghambal sang Filipino kag kun kaisa nagaupod pa sa Chinese Filipino communities.
“Malawak ‘yung kanilang network because they are deep funded. Secondly, alam naman natin our relationship with China is very high ‘yung distrust and mistrust. Naturally, they would send spies. The problem is – we have an archaic, very old, obsolete, espionage law way back World War 2,” pahayag pa sang analyst.
Nagpanawagan ini nga usisaon gid sang maayo kag mag-conduct sang background check sa mga indibidwal nga gusto mag-upod sa mga institusyon kaangay sang Philippine Coast Guard Auxiliary.
Matandaan nga ginkumpirma anay sang PCG nga ginkakas sini sa listahan ang 36 ka mga tawo nga may “shaky” citizenship ukon natumod nga mga Chinese nationals.
Matandaan nga una na nagpaandam si Sen. Panfilo Lacson nga may Chinese “sleeper agents” kag mga operatiba nagikan sa People’s Liberation Army (PLA) sang China nga nagapang-espiya diri sa Pilipinas — kaangay sang nauna na-report nga suspected espionage activities sa Palawan, Makati, Dumaguete, malapit sa Camp Aguinaldo, sa Commission on Elections office sa Manila, kag mangin sa Malacanang.#
