ILOILO CITY – Nagpaandam ang Iloilo City Government sa mga negosyante nga padayon nga nagabaligya sang modified mufflers.
Sa interview sang Bombo Radyo kay Retired Colonel Uldarico Garbanzos, pinuno sang Iloilo City Traffic Management Unit, iya ginpahayag nga masami nga ginabaligya ang mga modified mufflers sa online marketplace, apang patago lang.
Suno kay Garbanzos, daw kaangay nga ginabaligya sa black market ang mga modified muffler.
Ginpahayag sini nga dapat nga ipaintindi sang mga negosyante nga hugot nga ginadumilian ang modified mufflers sa Iloilo City santo sa “Anti-Modified Mufflers Ordinance”.
Samtang, siyam naman ka mga establisyemento sa Iloilo City nga nagabaligya sang modified mufflers ang gindagdagan sang closure order.
Sa interview sang Bombo Radyo kay Mr. Norman Tabud, pinuno sang Business Permits & Licensing Division sang syudad, iya ginpahayag nga ang nasambit nga mga establisyemento ang wala sang business permit.
Ang mga ini ang nahamtang sa distrito sang Jaro, Mandurriao kag Molo.
Pasugtan naman ang mga ini nga magbukas sa tion nga makakuha ang mga ini sang business permit.
