Wala ginakalimtan sang mga manunudlo ang pagtudlo sa mga estudyante sa mga leksyon dala sang pagpang-abuso nga natabo sang ginpatuman ang Martial Law sa Pilipinas.
Ini ang pahayag sang Department of Education (DepEd) kadungan sang pagdumdom sang ika-48 nga anibersaryo sang proklamasyon sang military rule sa pungsod sa idalom sang pagginahum ni anay Presidente Ferdinand Marcos.
Suno kay Education Undersecretary Diosdado San Antonio, ginatudlo ini nga mga leksyon sa mga estudayante sang K to 12 program bangud kabahin ini sang ‘most-essential learning competencies’ para sa subject nga Araling Panlipunan sang Grade 6 pupils.
Lakip sa ginapahangop sa mga estudyante amo ang rason kun ngaa ginpatuman ni Marcos ang batas-militar, ang epekto sini sa socio-cultural, political kag economic field sang pungsod.
Suno naman sa ginaduso sang grupo nga Akbayan: “DepEd and CHED are legally mandated to include Martial Law human rights violations into the education curriculum.” Ini ang mas ginpabaskog pa sang Human Rights Victims Reparation and Recognition Act of 2013.
Suno sa mga report sang human rights watchdog nga Amnesty International, ginabanta 100,000 ka mga tawo ang biktima sang martial law; 3,000 ang ginpatay, 34,000 ang gin-torture kag 70,000 ang gin-aresto nga wala ginpaagi sa husto nga proseso sang layi. #
