Gindeklarar nga grand champions sa 8th Asia Dengue Summit ang grupo sang mga estudyante halin sa Santa Barbara National Comprehensive High School.
Ini amo ang senior high school students nga sanday Monica Gerona, Roy Benedict Salanatin, kag Res John Senibalo, kaupod ang ila coach nga si Maria Bella Martizano Vijar.
Gintawag nila ang ila grupo nga Aedes Avengers.
Nakuha nila ang titulo nga Dengue Slayers Challenge 2025 Asia Pacific Grand Champions matapos ang pagpresentar nila sang MosQUITo Alert Module and Community D-tech – nga isa ka ginakabig nga game-changer sa dengue prevention.
Ginpierde nila ang mga tiglawas halin sa Thailand, Malaysia, Singapore, kag Indonesia.
Ang amo nga proyekto ang kombinasyon sang educational modules kag mobile technology nga nagahimo sang dengue prevention nga mas accessible kag mas engaging sa mga tawo ilabi na sa pamatan-on.
Ini nga proyekto ang naga-promote sang health education kag naga- enable sang real-time community reporting.
Sa interview sang Bombo Radyo kay Maria Bella Martizano Vijar, coach sang Aedes Avengers, iya ginpahayag nga ang mga student-participants ang ginhatagan sang task nga maghimo sang prototype ukon mag- conceptualize sang teknolohiya nga magatutok sa mosquito control ukon health monitoring kag may mabakod nga emphasis sa digital innovation, impact sa komunidad kag, environment sustainability.
Suno kay Vijar, isa ini ka positibo nga butang nga naga-highlight man sang papel sang kabataan sa promosyon sang ikaayong-lawas sang publiko ilabi na sa dengue nga tuman nga nagaapekto sa madamo nga tawo sa pungsod.
Nahibaluan nga ang tatlo ka mga estudyante ang lunsay mga dengue survivors man rason kun ngaa naengganyo sila nga magpasakop sa kompetisyon.
