Amat-amat na nga nakagwa sa ospital ang mga estudyante sang Guimaras State University (GSU) matapos nangin biktima sang food poisoning sa ila ginkaon nga spaghetti.
Sa interview sang Bombo Radyo kay PCapt. Rene Mercado, Officer in Charge sang Buenavista Municipal Police Station, iya ginpahayag nga sa ginabanta 240 ka mga biktima, yara na sa kapin 100 ang napang-discharge sa ospital.
Nahibaluan nga masobra 130 ka mga biktima ang gindala sa Dr. Catalino Gallego Nava Provincial Hospital sa Jordan samtang ang iban ang gindala sa Buenavista Emergency Hospital sa Buenavista.
Una na ginpahayag ni Dr. Lilian Diana Parreño, presidente sang unibersidad, nga nag-hire ang committee in charge sa food preparation sang cook nga naghanda sang 70 kilos sang spaghetti para sa ginabanta nga 1,400 ka tawo
para sa business innovators event.
Suno sa iya, ang pasta ang ginluto sang 1:00 sang kaagahon kag las 6:00 naman sang aga ang sauce kag ginpakaon ang mga ini las 10:00 sang aga.
Bangud madamo sang nabilin nga pagkaon, gindala ini pauli sang iban nga estudyante.
Ginpat-ud naman sang unibersidad nga sabton nila ang tanan nga gasto sa ospital sang mga biktima.
