Naghatag sang bugal sa Pilipinas ang Grade 10 students sang PAREF Westbridge School matapos nagdaog sa International Science and Math Olympiad Competition of Southeast Asia (ISOCSEA) sa Chiang Mai, Thailand.
Ang kompetisyon ang ginpatigayon sang Disyembre 20 tubtob 24, 2024.
Lakip sa mga nakakuha sang gold medal sa International Science Olympiad Competition of Southeast Asia amo sanday Shaun Ryielle Yap, Jose Iñigo Sotelo, Jose Gabriel Amarante kag Gualfredo Ramon Servano.
Magluwas diri, nakakuha man sang bronze medal si Yap sa International Math Olympiad Competition.
Nagpasakop ang mga ini sa national rounds sa Pilipinas antes nakalab-ot sa international rounds.
Sa interview sang Bombo Radyo kay Yap, residente sang Bitoon, Jaro, Iloilo City, iya ginpahayag nga ini na ang iya ikatatlo nga beses nga nagpasakop sa kompetisyon sa diin una diri ang sa Malaysia, Hong Kong kag pinakaulihi naman sa Thailand.
Nakakuha ini sang gold medal sa Malaysia kag bronze medal sa Hong Kong.
Nahimo naman sini nga mabalanse ang pagtuon kag ang extra-curricular activities bilang President sang Student Council.
Wala naman nagalaom si Sotelo nga magdaog ini sa pinakauna niya nga pagpasakop sa kompetisyon.
Sa interview sang Bombo Radyo kay Sotelo, residente sang Don Francisco Village sa M.H. Del Pilar, Jaro, Iloilo City, iya ginpahayag nga ang iya gid nga mga ginikanan ang nagtulod sa iya nga magpasakop sa kompetisyon kag nagapasalamat man ini sa iya lolo kag lola.
Bilang isa ka varsity player sa football, gin-ako ni Sotelo nga ginsakripisyo sini ang iya hampang, agud makatutok sa pagtuon.
Suno naman kay Servano sang Ungka, Jaro, Iloilo City, iya ginpahayag nga dungan sila nga classmates nga nagatuon sa tion nga matapos ang klase.
Nangin dako man nga bulig ang ila manunudlo nga si Bryan Tagabe sa ila training.
Kaangay ni Sotelo, ginbalanse man sini ang iya paghampang sang football kag pagtuon.
