Patay ang 52-anyos nga manugpangisda matapos mabungguan sang modernized jeep sa Barangay Atabayan, Tigbauan, Iloilo.
Ang biktima amo si Pablo Titular Malaga, soltero, manugpangisda, kag residente sang nasambit nga barangay.
Ang driver naman sang modernized Jeep amo si Kim Andrew Fariolan Tunay, 40, kasado, kag residente sang Barangay Banuyao, Miag-ao, Iloilo.
Sa interview sang Bombo Radyo kay Police Captain Alfred Mansoy, hepe sang Tigbauan Municipal Police Station, iya ginpahayag nga halin sa Miagao ang jeep kag padulong kuntani sa syudad sang Iloilo dala ang pila ka mga pasahero.
Lakip man sa mga pasahero ang mga estudyante kag manunudlo sang University of the Philippines Visayas (UPV) High School.
Suno sa hepe, nagtabok sa karsada si Malaga apang malayo ini sa pedestrian lane kag madulom man ang lugar.
Nag-angkon naman sang pilas sa nagkalain-lain nga parte sang lawas kag ulo si Malaga nga gintunaan sang iya kamatayon.
Samtang, preso naman sa Tigbauan Municipal Police Station ang driver sang modernized jeep.
Kaangot sini, nagpalab-ot man sang simpatiya ang si UP Visayas Chancellor Dr. Clement Camposano sa pamilya sang napatay.
Ginkumpirma man sini nga ipaidalom sa debriefing session ang ila mga estudyante sa UP High School nga sakay sang modernized jeep.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗣𝗵𝗮𝘂𝗹𝗶𝗻𝗲 𝗣𝗶𝗹𝗹𝗼𝗿𝗮
