Naghakot sang bulawan nga medalya ang mga produkto sang University of San Agustin—Conservatory of Music sa Borneo International Vocal Arts Festival (BIVAF) 2025 nga ginpatigayon sa Sarawak, Malaysia.
Ini amo sanday Demmie Nicolette Maza nga tumandok sang Antique kag Adrianne Kylle Cortez sang Compania, Molo, Iloilo City kag pareho nga yara na sa 5th year sa Conservatory of Music.
Kaupod man nila ang ila Academic Supervisor nga si Prof. Gerardo Vicente Muyuela, DMA (Doctor of Musical Arts) nga amo ang nagtukar sang piano sa ila nga performance.
Sanday Maza kag Cortez ang pareho nga nagdaug sang gold medal sa Classical Open Category Singing Competition para sa ages 19 and above nga category.
Si Maza man ang nakakuha sang title sang Category Winner kag nag- compete sa Absolute Winners Competition, ukon ang Grand Prix.
Suno naman kay Prof. Gerardo Vicente Muyuela, dako nga dungog ini para sa ila bangud ini ang una nga international competition nga nagpasakop ang University of San Agustin—Conservatory of Music.
Ini pa lang ang second edition sang Borneo International Vocal Arts Festival nga nagahatag sang platform para sa mga bokalista nga maka-perform, maka-compete, kag makatuon gikan sa mga professionals.
Nagpasalamat naman si Muyuela sa tanan nga nagsuporta sa ila agud matiglawas ang Pilipinas kag mapakita ang abilidad sang mga estudyante sang University of San Agustin sa bilog nga kalibutan.
