ILOILO CITY – Makahalanusbo ang sitwasyon sang mga evacuees gikan sa Marawi City.
Ini ang paglaragway ni Jerwin Carlo Bungcal sang Banana Planters and Exporters sa Mindanao matapos nga nagdul-ong sang bulig ang ila nga grupo.
Suno kay Bungcal sa interview asng Bombo Radyo, 600 ka mga pamilya ang yara sa covered court nga ginhimo nga evacuation area sa Taguiran, Lanao del Sur.
Basa ang mga ini ilabi na ang mga kabataan sa ti-on nga magbubo ang ulan.
Nabudlayan man suno sa iya ang mga evacuees bangud naanad ang mga ini sa malinong nila nga pagpangabuhi sa Marawi City.
Pahayag sini, yara man ang mga NGOs nga nagabulig sa mga evacuees kag nagapatigayon man sang stress debriefing.
Mas kinahanglan suno kay Bungcal ang tubig ilimnon kag gatas para sa mga bata nga yara sa evacuation area.
Nagahingyo man ini nga buligan sang gobyerno ang mga nag-evacuate sa ila nga mga himata bangud nagapamigado naman ang mga ini matapos nga duha na ka semana ang pagtinir sang ila mga himata matapos maglikaw sa kinagamo.